“Mugimendu orok balio du” dio jarduera fisikoa sustatzeko Osasunaren Mundu Erakundearen (OME) esloganak. Ariketa fisikoa oso garrantzitsua da adinekoengan, zahartzen garen heinean osasuna eta bizi-kalitatea hobetzeko. Izan ere, azken urteotan gero eta gehiago ari dira ikertzen zahartzeari eta ariketa fisikoak gainbehera fisikoaren prebentzioan duen rolari buruz.
Bideo soil baten bidez, ikerketa-jarduera horren esperientzia eta emaitzak azalduko dizkizuegu. Horrez gain, indarra, erresistentzia, oreka eta malgutasuna lantzeko ariketa praktiko batzuk helarazten dizkizuegu. Egunerokoan egin daitezke, mugikortasun jasangarriko aukerekin, bai eta pandemia-garaian ere, bizi garen tokian bertan ariketak egiteko onlineko aukerekin. Azkenik, bideoan azaldutakoa praktikan jartzeko eta sare sozialetan interakzioan egoteko erronka bat proposatzen dizugu.